ಹೊಸ ದುರ್ಮುಖ

ನಮ್ಮೊಳಗಿನ ಕಿಲುಬು ನುರಿದು
ಹೊಸ "ದುರ್ಮುಖ" ಬರುತಿದೆ
ನಿಮಿಷ ಉರುಳಿ ವರುಷ ಹೊರಳಿ
ಹೊಸದು ಅರಸು ಎನುತಿದೆ.

ಆಶಯಗಳು ಮಾತು ದಾಟಿ
ನಿಜ ಅರ್ಥವ ಧರಿಸಲಿ
ತೋರಿಕೆಗಳ ಬಿಮ್ಮಿನೊಳಗು
ತನ್ನ ತಾನು ಅರಿಯಲಿ.

ಮನೋವಾಕ್ಕಾಯದಲ್ಲಿ
ನಮ್ರತೆಯು ನೆಲೆಸಲಿ
ಪರರ ಒಳಿತು ತರಲಿ ಹಿಗ್ಗು
ನಂಜನೆಲ್ಲ ತೊಳೆಯಲಿ.

ನೂರು ಮಾತು ನೂರು ಆಸೆ
ನೂರು ನೆನಪಿನುಬ್ಬರ
ಸ್ನೇಹ ಪ್ರೀತಿ ಜೀವ ಭಾವ
ಅಚ್ಚು ಮೆಚ್ಚು ಸಂಭ್ರಮ.

ಬಾನು ಭೂಮಿ ಮೌನ ಮೊಗ್ಗೆ
ಪ್ರಕೃತಿಯೇ ಗುರು ದೈವವು
ಸಾಕ್ಷಿ , ಪ್ರಜ್ಞೆ - ಎಲ್ಲ ಮಾತು
ಸ್ವಚ್ಛತೆ ನೈವೇದ್ಯವು.

ಶುಭಾಶಯದ ಸಂತೆಯಲ್ಲಿ
ಸ್ವನಿರೀಕ್ಷೆಗೆ ತೊಡಗಲಿ
ವರುಷದಲ್ಲಿ ಹೊಸದೇನಿದೆ ?
ಹೊಸತು ಸ್ವಾಂತವಾಗಲಿ
ಚಿದಾನಂದ ಹೊಮ್ಮಲಿ.

ದುರ್ಮುಖವೋ ದುರ್ಮುಖಿಯೋ
ದೋಣಿ ಮುಂದೆ ಸಾಗಲಿ ;
ಕಾಲದೋಟದ ಕ್ಷಣಿಕಗಳಲಿ
ಸುಮುಖ ಸುಮುಖ ಎನಿಸಲಿ.

**

ಕಾಲು - ಎಂದೂ ನಿಲ್ಲದಿರಲಿ
ಕಾಲದ ಜೊತೆ ಸಾಗಲಿ
ನಾಳೆ ಏನೋ ತಿಳಿಯದೋಟ
ಹೆಜ್ಜೆ ಸ್ಥಿರತೆ ಕಾಣಲಿ
 ಕಾಲದ ಜೊತೆ ಏಗಲಿ;
ಕಾಲಕೆ ಶಿರ ಬಾಗಲಿ.

***